X  X  X

Kažkumet bėngsės mōna. Ėr mūsa.
Vardā kap lītos stėklo nobiegs.
Aš nebibūsio, to nebibūsi...
Vedoms pasaulis būs omžėns. Kap nieks.
 
Omžėns kap vėskas. Džiaugsīs a kriuoksi,
Nikumet niekam kėtēp nebūs.
Nuors nebovėma ėr neėšmuoksi –
Beregint šėrdės gīvībės prėplūst,
 
Ėr po mėnotas, ėr po sekundės
Ėš vėsuos sīluos viel kabėnīs –
Kou tik pametės, tujau pat rondi...
Akis par zelkuorio slīstėnā slīst –
 
Neožkliūn raukšlės, retē, ni znuokā,
Katrū – kap slėnkstie – spierē daugie.
Ruoduos, ka sāvės dā neėšmuokā...
Vo rasint tuo sāvės nedaug ėr bie?..
 
Dabā īr čiesos, katras no dākta
Vėsos lig gāla tāva. Tik tau.
Paskiau būs doru... Tiktā be rāktu.
Ož anū nieks jau parētont neblauks.