X  X  X

Ėšplastās liekiev....
Vo atsėdūriev
Rodėnėis kėlpuo.
Longūs kap lītos –
Kaltė diel nieka
Ėr diel vėskuo – tėlpuov.
 
Viejē siūbou
Glousnius ė gėrgždėn
Šėrdi kap svėrti:
Vėskas ėr nieka,
Tomsa ėr saulė,
Gīventė ėr mėrtė.
 
A sosėtėksiau –
Dā sosėtėksiau?..
Bet a pažinsiau...
A vėsas skuolas
Beatėdousiau...
Ė begroužinsiau
 
Tou, kas atstuojė
Spindolė siūla
Mėglā pradortė...
Tou, kuo lėkėms
Ni vėinam nepasiūla, –
Rēk sosėkortė?..
 
Bet je sokūriev,
Je sosėkūriev –
Tiktā vėns kėta.
Tīsa i asla
Mėgla kap siūlā...
Nieka neblėka.
 
Tik tāva akis –
Sunkē negīvas...
Ligo stėklėnės.
Tik mona raukšlės –
Skaudē onkstīvas...
Ne paskotėnės.
 
Liekiev i saulė.
Vo atsėdūriev
Rodėnėis kėlpuo...
Nebie tuo maža
Jaukė pasaulė,
Katramė tėlpuov.