Alius Mildaa Labs.Rašysu daug tau.Vakar parskaičiau laikraštie aplei tavi. Kap pernaa tavi matydavau liūdna, ta  paskaitis apsidžiaugiau, kad tu dirbi i esi pralinksmiejusi. Sesi pasakuoji biški aplei tavi šimeeta. Nu ta noširdžiausie sveikinu su pergali i linku i toliau darbouteis tap gražee. Šindein apveiziejau taava paišinius, buvau užsuokis į muokykla, parvažioudams numij. Vasarą biški padurnėjau, pakliuvau į policiją, ta tievs tujau įdarbiena sava bruolia įmuonie. Bat i geraa. Gal būčiau su nusikaltelees susidiejis. Pas diedi mon patink. I piningun sava turu, i darbs įduomus. Pusbrolee geri, daug kuo iš anun pasimuokiau. Įstuojau į vakarieni  muokyklą, gal kap nuors baigsu vidurieni. Kažinkap i sauli daba atruoda šveisėsni. Žina, panaršiau po tuoki svetaini www.gyvenu.pws.lt  nu visa nieka. Pamėgink  gal i tau patiks. Nuoru atsiprašyti už onkstesnius sava laiškus. Tada tik nuoriejau pasijoukti iš tavis, pasiruodyti draugam kuoks aš keits! Nesamuonis. Ne tou keliu ejau.Užmiršk, je gali.... labaa prašau.Neturu juokiuos draugis, nors mon jau greit dvidešimt bus. Par kūčias esu gėmis. Gal parašyk mon, je gali mon atlesti mona patyčias, i viskun užmėršti. Nebnuoru būti  tuoks, kuoks buvau. Sarmata i pagalvuoti.... Almonts, bet draugaa muni Aliom vadin.   Milda Aliou "Tikriausee joukus pruoviji?" - galiečiau paklausti. Nu, kad i kap tėn bebūtom, ačiū už atsileipiamųjį laišką. Susiduomiejimą kel  keli dalykaa. Veins iš tuokių būtom, jog nepažinstu juokia Almonta. Kas tava sesou i kažin a kada muokes Tikšelių vidurinie? Pati esu nelinkusi į naujas pažintis i priklausau žmuonių tipou, katrei nepul pažindinteis su visaas i nesiduom draugų draugaas. Pavyzdžiou dažnaa nutink, kad geru alų su drauga draugaas i nežinau anų vardų, omžiaus a suocialinis padėteis. Nu būn tap, kad pasidaraa apatišks. Da diekavuoju už sveikinimus, bat jau mienou,  kap nieka nepaišau. Vakar parsivežiau kompjuterį  iš tris savaitis trokusis techninis apžiūruos i gal pradiesu, nežinau. Nustebiena tava parekomėndouts internietinis poslapis - negi aš tap panaši į potenciali saviežudi? Ne kų mažiau stebin tava žemaičių tarmie. Juk šiąs laikaas nieks nebnuor žemaitiškaa šnekieti, vo tou labiau rašyti. Keists tava laišks, bat turiek omenie, kad šias laikaas žmuonimis pasitikieti rizikings reikals. I atgauti pasitikiejimą ne tap paprasta.   Alius Mildaa Laba deina. Pirmiausie ačiū už tun, ka monij parašee. Kėik supratau Tau nepatink mona žemaičiavims. Patink tau a nepatink, bat aš visteik tap rašysu, bo esu žemaitis, tik iš onksta atsiprašau už klaidas. Gramatika sunkus dalyks. Muokaus, nepraleidinieju pamuokų. Tikous pakėntamaa išmuokti i nebdaryti daug klaidun. Ačiū, ka atsileipie. Tu muni esi mačiusi, i šnekiejusi esi, tik nežinuojee su kuo šnekys. Vo tas pasirokavėms mon da tebie gyvs.... Tik nesupyk. Parašyk nuors du žuodius. Ate.  Almonts.   Milda Aliou . Tumet primink aplei savi, atsiūsk sava foto a da kų nuors. Nes munij nesuprontamas tava paslaptinguoma pričynas. Matyt, liubiji  zabuovas...     Alius Mildaa Gera. Atsiūsu sava fuotki. Tik turiesi palaukti, kol gryšu numij i pasijimsu fuotoaparatą. Čia pas diedi nieka  neturu. Vo tu mon sava atsiusi?   Milda Aliou Nu je būsi gers...   Alius Mildaa  Laba deina. Viel rašau Tau. A pastebi, aš jau maža darau klaidų. Parsiprašau, kad negaliu išpildyti sava pažada. Da negaliu pasiūsti sava nuotraukas. Jau ontras mienou nubuodžiauju luovuo. Negaliejau ne atsisiesti, ne ont šuona pasiversti.  Nu šindein leida vartyteis luovuo.Vuo kad žinuotumi, kuoki palaima viel judieti. Pusbruolis atveži sava kompą, nuors liguoninie neleid nieka elektrienia turieti. Net mobiliakų neleid pasikrauti. Tad skubu Tau parašyti, kol baterki nenulūža. Gal Tau visa neįduome, bet pasakysu Tau, kad susižaluojau par durnuomą. Variem su kaima hebryte į Šiaulius, į šuokius. Tėn apsikūliem. Šiauliškie aptalžė mūsa mašiną, išdauži lėmpas. Anij jau pajudieja, ka aš nuoriedams atkeršyti so raktu pouliau anų mašiną. Ta anij pavari ont monis, i da karta atbuli parvažiava. Ta vot policija užvedi bylą, nuors mas nieka negalem pasakyti. Patys kalti. Viskų pasijėmiau ont sava galvuos. Negaliu draugų kėšti. Dėl monis viskas atsitieka. I delkuo aš tuoks prakeikts. Jau džiaugiaus, kad pas diedi geraa gyvenu, užsimėrša praeitis.....i vo kap. Nu nieka, kap nuors išsilaižysu. Meldžiau Dievą, kad numėrčiau, bat ištvieriau. Daba, ka leida vartyteis, jau esu puons! Mislijau, kad tuoks i lėksu pagalys, bet ne, išgysu. Pasaulis viel mona akims i pruotou viliuojėntis.  Kuol guliejau ,keik tik leida jiegas muokiaus lietuvių gramatiką,  mėsliju, kad fizinia darba nebgaliesu dėrbti, vo jug kažkap douna reiks pelnyti. Neraštingam šansu niera. Tad muokaus viesą laiką. Jau reik atsisveikinti i toliau gydyteis solaužytus kaulelius. Da nemaža laika nuveis, kol galiesu atsisiesti. Kap Tu gyveni? Je nenuori nepasakuok, kas aš tuoks , kad monim pasitikietum. Tik maldauju atsiūsk nuors tušti laiškieli. Žinuosu, kad kažinkas muni išklausi i mon bus linksmiau, ba su monim žmoniška nieks nebibindrau. Saka, aš nepataisuoms. Vo kad anij galietu supraasti mona mintis, ta žinuotų, kad nuoru būti gers, bet mon nesisek. Bai Alius     Milda Aliou       Labs.  Gana keistaa, negi  jau teik laika prabiega? Mon ons tempaas kap begalybi. Sunkus groudia mienou bova. Kap suprontu i tau. Šiap mon keistaa yr atrašyti į laiškus nepažįstamam žmuogou, da keisčiau anus gauti. Esu pastebiejusi, kad gavusi pruogą, pradedu žmuonims  skunsteis. Viskou. Kap mon negeraa, liūdna, smaug depriesija i panašie. Vo šiap pagalvuojus, žmuonis labiau truokšt gerų naujynų,vo aš anims visuokias nesąmuones į galvą kišu. Bat ar aš kun gera turu pasakyti? Turbūt nelaba. Groude pradžiuo kiesinaus į sava gyvybi. Tap paprasta aplei nieką negalvuodama. Bat kas par garbie Mižniams, kad skundinčiaus Vintuo? Tilta tap i nepaseikiau, įsisvadiena pro šalį važiavis pažįstams. Šiap da mona ronką pouš negili rondelie. Bat ilgainiou, pjaudama nebjautu skausma, nebie i prasmies. Ne šiap sau žmuonis pjaustuos,vo noriedami tap išleiti sava dvasinį skausmą - anų pavert fiziniu. Deja, nesu pochuisti i pasaulis mon atruodo tumsiesnis, negu kitim. Vo tap i praeja mienou. Nelinksmus gimtadeinis, nelinksmas Kaliedas, nelinksmus Naujųjų sutikims. Vo šiap gyvenu gana geraa. Paišau žmuonims už piningus. Kartas palakstau su sava baltu šunim po sneigą.  Meigtu ligi vidurdeinia i ištisas valundas klausaus muzikas. Tujau baigses kap niekada ilgas muokyklines atuostuogas. Kuokiami mieste gydas? Netingiek, sveik.   Alius Mildaa Labs. Pirmiausie pasakyk a tu sveika? A viskas tau geraa? Vuo Viešpateliau! Parskaičiau i tap panuorau kou greičiau liekti pas tavi. Surasti nuors pasaulia gali i pasakyti – gyvenk, kad i kap butom sunkie, gyvenk kitun pykčiou, gyvenk deltuo, kad kituos proguos gyventi  nebturiesi. Mesk iš galvuos viskon aplei mirtį. Gyvenims tuoks gražus, kad i kuoks šudins ons bebutom. I mon gyvenims šudins. Pirmiau buvau Šiauliun liguoninie. Iš tėn tau parašiau paskutinį laišką. JAU VISA NEBLOGA JAUČIAUS. Ka leida vartyteis, beseikdams kažkuo, iškritau iš luovas i kažinkas nutrūko matyt, ba nebjaučiau kuoju, Tada su greituoja išveži į Vilnių. Viel operacija. Viel negaliu judieti. Kuojas juntu, ka daktars dor, skaud. Leid po biškį pabūti pusiau guluom pusiau sieduom, keik gipsus leid. Blogiausie, kad čia bud tuoki jauna graži sesieli, i ka ana pakiš mon basuoną, ta nuors spruok iš sarmatas. Pagaliau sulaukiau pusbruolia atvažioujint.Kuoki laimi, kad ons kompą atsiveži,vo tap da nieka aplei tave nebūčiau žinuojis. Ons pabuus puora deinų Vilniou. Rytuo viel atvažious tievs. Viel klausysous anuo pamuokslų.Tegu. Iškintiesu. Kad tik galiečiau vakščiuoti, kad tik galiečiau. Bet tas paaiškies tik vasaria dešimtuo. Vo kad tu žinuotumi, kap lauku tuos deinuos! Net  valundas skaičiouju. Kad tik greičiau. Tap tikous,  kad vakščiuosu.Aašaras birn, ka pagalvuoju aplei invalida vežimielį. Milda, laikykees, nebeik ont tilta, nebipjauk ronkų, gyvenk, laikykes, nepasidouk!!!!  Maldauju parašyk, paruodyk, kad da esi. Prašau. Prašau. Ryt i puoryt da ateis pas muni pusbruolis. Lauksu tava laiška. LABALABALAUKSU. Alius. Milda Aliou Labs.  Nu, mata, da gyva. I ne kaži keik daug teprarasčiau mėrdama, nebint, kap tu saka, galimybi sulaukti ateiteis. Žmuonis turietų aplei kun šnekieti, gal net gailieti, bet iš teisybis tiktaa smerktų. Arba linksmintumees  par muona laiduotuves, kap linksminuos par mona klasiuokis, kap ana nusižodi. Niekada nepamiršu sava klasiuoka žuodių: „A eisi šį vakarą į Gintaris pagrabą pasidergti?" Paklausi ons monis su tuoki šlykščia šypsena..pasibjaurietina...  Šiap turu pasakyti, ka sulaukiau gražia laiška iš tavis. Užjautu dėl dar veinuos operacijas. Aš ta lauku pavasaria. Visi anuo lauk. Tik nekėntu atlydžių kumet tykšt šlaps sneigs i driegmie skverbaas pro mona batus. Nuors šaltis mon nebaisus, paprastaa  nesergu peršaliema liguom. Ta siekmies laukont pavasaria (waiting for spring). Klyksmus   Alius Mildaa Labs, vo kuoks ilgs buova šis ryts. Laukiau laukiau nebsulaukiau pusbruolia. Pagaliau ateja. Be kompa. Vo dievi už kun mon tuoki bausmie?!   Buova paliekis už durių, mat špuosa mon ištaisi. Vo aš vuos neapsikriokiau. Galiečiau pasikelti, ta sumesčiau anam į koprą. Bet teik tuo. Svarbiausie kad galiu su tavim susiseikti. Laba ačiū, kad atsakie. Aš jau kuošmarus sapnavau. Negalvuok aplei mirtį. Pati sakie, kap bova par Gintaris pagrabą. Beje aš biški pažinuojau Gintari. Iš matyma. Da nu veina iš Nakulienų bičiuoka buvau gavis pasiūliema su ana nakti praleisti už pėnkesdešimt litu. Bet aš bjauriejaus prostitucija, nuors draugeliams vaidinau keita tuo veituo. Gal žina, delkuo ana nusižodi? Neverta mirteis šaukteis pačiam ir tou padaryti džiaugsma sava neprieteliams. Vein anų piktumou verta gyventi. Vo mon širyt daktars pasaki gera naujyną. Kėta savaiti nukirps gipsą i gausu tik fiksatuorius. Žinoma su sąlyga, kad viel neišdrėbsu iš luovas. Laba lauku tuos deinuos, kap muni pastatys ont kuojų. Tada ta bus švėnti. Neužėlgu atvažious tievs su diede. Atveš vaduovelius. Prašiau. Laiks biegs greičiau. Gal pavyks  savaronkiška kų nuors išmuokti, i pavasarį arba nuors rudinį atsiskaityti už vinioulėktą klasi.  Keik aš daba viskuo nuoru! Tik sveikatas nebturu,vo kol turiejau anuos nebrunginau. I daba munim nieks nevierij. Vo  aš anyms įruodysu, kad galiu! Už longa šveit  sauli, atruoda tap gražee, nuors Martis saki, kad devyniuolėka šalčia yr. Jau atvež peitus. Reik baigti tau laiškielį,  Martis jau nuor išeiti. Da kažkuokių neatideliuotinų reikalų tor. Da žadieja ryt ateiti. Da ryt tau parašysu. Vo paskou viel ilgam palieksu veins. Pabuk da veinami laiškelie su munim. Prašau. Aš tuoks veins. Papasakuok kap tau sekas muokykluo. A daug draugų turi? Kap muoksla? Kor žadi toliau muokinteis. Gal su daili kun? Laba graži tava paišinie. God bay(gal tap rašuos?). Iki rytuojaus Alius P.S.   Vo  dėlkuo tu KLYKSMUS?   Milda Aliou Labs. Šindein rašiau istuorijas bandomujį egzaminą. Reikieja pustrečiuos valunduos šalti fizikas kabinieti. Puosi velnia tuoks. Bet luogiška, jug tikrasis bus sunkiesnis. Visa savaiti, kap nerondu sau veitas mokykluo, klasiuoki serg, nekėntu, ka ana tuoki ištiežus, mažiau vadaluotus po Mižnius plika galva i nereikietu sėrgti. Juokia maluonoma eit rūkyt veina.Daugiau negu priš savaiti susitaikiau su sava senuoja drauge.  Kap gera viel leisti valundas su ana. I kap sunke ka draugs atsisaka bindrauti su tavimi. Tuokiu atveju be tabliečių ypatinga butu sunku gyventi.  Dėlkuo  ont monis visi pykst, aš ta nemuoku rimta pykti unt sau brungių žmuonių. Nes tap nedaug anu turu. Vo  šiap kas daugiau gera tuo muokykluo, nieka, sumauta šveitiema sistema. Kartą pinktuokėli monis paklausi "A tu guoti? Vo gal tu pusiau guoti?" Nuors griūk negyvs! Reiks pasikeist garderuobą...  Žina, kuo tau galiečiau pavydiet? Vo tuo, kad gali netrukduoms išsimeiguoti. Mona gyvenimi meigs užiam tik ketvirtadalį paruos. Už tat savaitgalias prameigtu posi deinuos. Tap i slenk žeima beprasmiška.  Klyksmas yr mona slapyvardis. Gražiuos i įdomiuos atsiradėma istuorijas ons netor..   Alius Mildaa Labs. Šindein mon laimi. Vakar tievs išpraši iš daktara leidiemą mon veina deina turieti kompjuteri. Ta Martis širyt palieka kompa mon visa deina. Ta be parstuoja klausiaus tava atsiustuos mozikas, nuors nesupratau aplei ku ana. Martis saki, kad anuos pavadinims reišk pavasaria laukiema. Kap gera, kad ons tor mobilų internietą. Kelis kartus skaičiau visus laiškus. I tap panoriejau susitiekti tavi, bat ta tik „pasvajuok Martyna". Da velniuoniška daug laika teks praleisti liguoninie. Tu laiminga, ka gali parūkyti, vo aš jau i kvapa cigarieta baigu užmėršti. Juk negaliu palatuo i da luovuo rūkyti....    Skaičiau iš visų pusių  i nesupratau. Ta tu vaikiena neteka? I ta del tuo vartuoji narkuotikus? A tu nebije, ka paskou be anų nebgaliesi gyventi? Aš daug daug pagalvuočiau priš prarydams tuokį daikčiuoką. Bet juk kuožnas gyven pagal savi. A teisinga supratau tava pasakyma aplei tablietkes? Nu vo del vaikinu, bus anu da i geresniu, kad i aš.(Joukouju):-)  kor tu diesi invalidą. Džiaugus, kad neatsisaka su munim paplepieti.  Ačiū. Tu mon pavydi meiga? Oooo galiečiau nuors i į viesa meiga mainyti prarasta sveikatą... bet tas neįmanuoma. Vo kun tu veiki, kad  maža laika leikt meigou? Daug muokas? A piningun stiprie kali? Parašyk je ne paslaptis aplei sava šeimą. A abodu tava tėvaa dirb? A turi daugiau bruoliu, sesiu a tik tų veiną? Laba noriečiau aš nebūti veinturtis i mamas laba pasisgendu. Prisėminu, kap ana muni mažą myloudava i ruoduos kažin kun atidoučiau, kad viel galiečiau pri anuos prisiglausti. Bet nežinau a kada tap bebus. Ana da neaplonki  monis. Vo gal anai nieks nepasaki  kas su munim nutieka... nežinau. Ka veins su savim bunu ištisas deinas, ta viskuo prisigalvuoju. Pasakyk a daug klaidu pridarau. Turiejau laika viesa deiną tad stėngiaus. Muokaus. Maniau, kad kuo išmuokt bus laba sunke, bet nelaba. tik nuorieti reik...bint jau mon. Jau ateja  Martis . Atidoudu anam kompą  i leiktu viel savaitie veins. Kėtą sobatą viel atvažious. Žadieja.  Tad su tavim atsisveikinu ligi kituos sobatas. Siekmies tau nugaliet gyvenima sunkumus i gaut gera ivertiniemą iš istuorijas. Buk stipri Milda-Klyksmaa. Jautu ta pravardie tau douta ne šiap sau. Alius Ate. Milda Aliou Labs. Eilieni deina. Galiečiau nebint išskirti skaisti sauli, šveitontį  pro dailis kabinieta longus, galimybį par pamuoką klausyti elektruoninis muzikas i gurkšnuoti kavą, rašunt dailis bandomųjį testą. Pavargis muokytuojis veids anai nepritink ka ana tuoki jauna. Tumet miegstu pajoukouti: „pinktadienis atėja - smegenys išvarvieja." Kietą kartą rašysu biškį paprasčiau. Kalbiedama aplei draugą, neturiejau mintie vaikėna. Narkuotikų nevartuoju, net piningų anims neturiečiau. Kalbiejau aplei antidepresantus. Nuors stipresni sukel priklausomybi, bet neteka tuokių gert. Apsieisu kol kas, nenuoru, kad aplinkinie mislintų, ka mon pasimaiši... Rūkau jau posi metų, bet nejautu priklausomybis. Vis dar turu sliepteis nu šeimuos, tipa nebrūkau. Nesu kamins, paskutiniu metu užtenk pakelia savaite, juk kada nuors reiks mesti, nes veins vyrs yr mon pasakis, kad rimti vyra nerūka i į rūkančias neveiz. Vo šiap muokaus i kartas paišau žmonims už piningus. Kuožną kartą atsijiemus piningus sau priseiku, kad paskutinis karts, bet kur tau...malouju  pati sau, juk kartas maluonu kap priedelį  gauti šampana, a išgėrsti kap muni pavadin "dievu". Aplei šeimą, ta tik teik, kad turu muotiną i sieserį. I su ta pati (šeima) bindrauju nedaug:  ausienis, garsi muzika i monis niera, nebegzistou aplinkinie, ta poikus būds nesivelti į buitinius ginčus. Nesu iš tų dvyliktuokių, katruos atvažiou į muokyklą su sava automobilias, tor rimtus vaikinus i lyderiau sava draugų kompanijuo. Nu i kas, už tat turu draugi, katra muni myl, pavež kor tik nuoru, leid rūkyti sava mašinuo, turu laisvi, nes juoks vaikins monis nekontroliou. Mata, įžvelgiau i gerų savybių. Alius Mildaa Labs. Nu aš jau numuus. Kun tik išėja masažisti. Suskaudiena visus kaulelius. Tujau pouliau pasitikrinti pašta, bat neradau tava laiškielia. Laba sugieli šėrdi. Atsileipk prašau. Alius Milda Aliou Sveiks.  Sveikinu su grįžtuviem numei. Gal ta tau poiki pruoga atnaujinti santykius su muotina. Aš sava santykius su muotina mėginu glaistyti. Neparonkie, kad jimtu pastuove dėl monis jaudinteis, kabinieteis a net šnipinieti. Semestras pralieki be didesnių nuostuolių, maniau būsu labiau nusimuokiusi, bet net nustebau - pažyme geri. Kas da gera.? Sausia dvidešimt trečią deiną Mižniuus vyka ruoko koncerts. Įduomie veinuo veituo pamatyt kone visus miesta gotus, metalistus, ruokerius ilgaas plaukaas i net skinus (forsus), tik pankų nebova. Viesas mergas auskarų prisivierusias kor tik gal, veina turieja ausie vinį, kita prisikabienusi stombi grondieni pri kelnių. Nelėngva manau tokims gyventi tuokiami kaimi kap Mižnie. Je aš nusidažyčiau plaukus jouda i jimčiau ekstrėvagantiška rėngteis kap mat būčiau diskriminoujama. Stengus savi užimti vis kuokia nuors veikla, bet nelėngva prisiversti. Gavau pasiūlymą lonkyti kalvystis būrielį. Šindien turiejau sava pirmųjį pamuoką. Įduomių nesąmuonių gal sužinuoti aplei metala lonkstyma ypatumus. Su muokytuoja pagalba nukaliau senuovinia tipa sagi. Anų paduovanuojau drauge kap i buvau pažadiejus, juk ta ne šiap kas, vo pirms darbs. Anai patėka... Kap tik puorą nuotraukų paruodysu.. (metals jouds, tik atruodo pilks, apšviests blykstis) Šiap galiu pasakyti, kad maža rašybas klaidų bedara, i tuos pačias iš žiopluoma renkont tekstą.    Alius Mildaa   Labs. Vajei, kap džiaugus gavis nu tavis laiškielį. Vis veins i veins. Nu ne visa veins. Numus niekada nepaleiktu veins. Ta mama, ta patievis, ta mamas draugi - kaimyni paleiktama su munim kap su mažu. Bloga maniau, ka mama nerūpu. I da kap rūpu. Deltuo esu laba laimings. Mon anuos labaa trūka.  Rytaas, ka masažą i monkštą padara sesielė, ta gerą valondą gulu kap kirvis, kol atsigaunu. Vis da velniška skaud traumoutas veitas. Judinont. Ka nejudu viskas gera. Daktara saka je nuoru judieti ba pruoblemų turu nebijuoti skausma i daug dėrbti. Ta yr monkštinteis. Mama sositari kad i par išeigines muni monkštintų. Žinuoma ne už ačiu.  Aplei posi keturių atein muokytuojee  iš muokyklas. Kartas i onkščiau. Pakaituom. nespieju nu veina atsėgauti, jau kėts kemš mon galvuon muokslus. Stengus. Juk neturu kituos išeiteis. Kad i pasveiksu fizinia darba nebgaliesu dėrbti. Pas diedi gryšti nebiera šansų. Tad reik kabinteis už tų muokslų, kad užsidėrbčiau douną. Vis teik, ka pagalvuoju aplei ateitį, baise daruos. Kam aš tuoks susukts busu tiekis? Žmuonuos tikra negausu. Gal tuoki pat sosuktą... Liguoninie laisva laika neturiejau kor dieti, vo daba net puokaičia nusnusti nier kada. Pri kompa pramuoguom galiu tik pusuntruos valunduos skėrti. Vo viesą kėtą deiną suryn monkšta i muokymuos. Žina, šindein bova atslinkis veins bičielis, bat patievis tyčia sedieja kartu, tad nieka negaliejuom pabazarinti.  Et. I netrauk monis jau praeitis. Tik par ton esu tuoks daba. Vo juk misliau kam kam bet tik ne mon nelaimė tenutėks. ŠŪDS. Gražie atruoda tava sagi. A negail bova anų atidouti drauge? Su kou tu važinieji į kalvysti? A nesunkie tau tuoks užsijėmims? Mėginau vaizduotie anų įsiseegti. Nesupratau kap tuu gal padaryti. Prašiau patievia vieluos gabalioka. Išlonksčiau tuoki pat, bat įsiegti į drabužį tap i nepavyka. Gal ana tik šiap paveizieti, vo ne nešiuoti? Pavydu tau tuo koncerta. Bučiau sveiks bovis, bučiau i aš tėn bovis. Jau ne mon tokei koncerta. Nu tuos auskaroutas mergas pažiurieti gražu. Bat tuokiuos į žmuonas nenuoriečiau. Brrrrr ka pagalvuoju, kad pri monis liestuus anuos vinis ausie a bombuo akminielis... Gera dara, kad banda sušvelninti santykius su mama. Ne anuoms suprasti jaunėmą, bat prarasti anų meili labai baisie. Aš kuokius pėnkis metus visa nebindravau su savoja. I ka ana atvažiava į liguoninę su taše drabužių i adijalu monis parsivežti, kriuokiau kap mažas. Kap gera kad ana mon viskon atleida. Tap gera, kad i papasakuoti nemuoku. Vo prirašiau! Tau i Skaityti nusibuos. I pats daug sugaišau laika, kol parsitikrinau klaidas. Ačiū, kad gera įvertina mona pažongą. Maloniau po tuokiun žodžių tuoliau muokyteis. Jau patievis atneši peitus. Reik valgyti. Paskou į muokslus kėbti. Tad linku sėkmies tau i geruos nuotaikas. Nesiparink tap. Viskas bus gera. Ate iki kito laiškelia. Alius. Milda Aliou Labs. Kon galiu papasakuoti. Nu nieka nesinuor veikti. Reik paišyti, bat nenuoru net pradieti, dėl tuo muotina putuojas. I šiap vis mažiau ana pasitiku. Net baisu cigarietus numeij parsinešti, kartas paleiktu pas draugi, kap šį vakarą, i visa be reikala... Nu nesvarbu. Reik nustuoti „šėkti į batą“ i gosdinti aplinkinius sava niūriuom mintim. Vo draugi mona tuoki gera, kad anai mon negaila nieka. Be baimis skuolinu piningus. Sagi buvau pažadiejusi anaij veiną vakarą, ka bova laba nusimėnus. Į kalvystis užsijėmimus nuvažiouju su muokytuoju,vo parsivež mama. Moni nustebiena užrašas ont įėjiema masyvių durių pro garažą į kalvi: „Dėl Maksa nepradiejau rūkyti". Anų į užrašė turbūt kažkuoks muokytuoja muokinys. Nu esmie, jog ne su eiliniu žmuogumi bėndrauju. Vo šiap mona pažymie geri. Muokymuos vidurkis aštouni.   Alius Mildaa Labs. Moni nustebiena tava atsakėms. Turu suvirškinti kuožną tava žuodį. Jau kelintą kartą skaitau i nepagaunu tikruosis prasmies pasakyma – „šėkti į batą".  A Ta reišk, kad tu tyčia  gozdini, a tu tik viskon sliepsi savie? A tava draugi tuoki pat nusivylusi gyvenimu? Vo tava mama tavis nemyl, kad tu anuos tori tap saugoteis? I a ta mamas neapykonta tau pastūmi tave mintims aplei mirtį? Mesk ton iš galvos. Mona mama monis  nekensti  tikra tor pričynų, i maniau, kad nekent.  Daba pakeičiau savo manymą. Juk tu nieka neužmuša, delkuo  ana   tor tavis nekensti? Papasakuok je gali.  Aš busu tava minčiu kapu. Gal tau nu tuo bus geriau? Mas abuodu nelaimingi. Gal galiesam padiet veins kitam... Mon laba daug kėla klausimų, bat anus pasilėksu kitam kartou. Tu muni vis labiau duomini. Api tavi galvuodams net sava negalią pamirštu i kartas vos nepadarau tap, kap negal. A tu mon atsakysi kuo paklausu? Tu monis irgi klausk kas duomin. Alius   Milda Aliou Nu „šėkti į batą" reišk bijuoti :) Vo žmuonių aš gondinti visa nenuoru. Nenaudinga mon. I nepatink ka muotina jam monis klausinieti  dėlkuo aš save pjausčiau, kame pričyna. Nes negaliesu ana atsakyti, neturiesu kap paaiškinti. Teik ana, teik sesou vadin ton išsidirbiniejimu i galvuo, ka aš tap seiku diemesia. Visiška nesąmuoni. Ka puora kartų įsipjuoviau muokyklas tualeti, sužinuoja auklėtuoja, praneši muotina, jau galvuojau jims čia muni visi kamantinieti. Bet nieka. Net joukinga. Nežiena tei pedagoga kap tokiuos situacijuos elgteis. Net draugie nedrinstu tokių nutikėmų pasakuoti, nuors aplei ronką ana žėna. I šiap, mona draugi gyvenima nuskriausta labiau už muni - anų palėka  muotina, išdavi, gyven su sena sava baba i yr pastuovie varžuoma, neleid niekor studijouti. Tap i palaikuom veina kėtaa draugėja, aš anų paremu kartaas i piningaas. Jau po biški reik roušteis dvyliktuokų šimtadeiniou,vo svarbiausie egzaminams. Nebipatink jau vakščiuoti į pamuokas. Turem mas tuokį alkohuoliką matematikas muokytuoji, seną i nutukusį. Kartą, parlek į klasi i jam skubie aiškinti lygtį, aš pakelu akis i pamatau, ka mokytojaus kelnių užtrauktuks platee atsegts, vo tas klyns dėl apkūnoma išsišuokis, dievi  mona , kuoki trauma.. Ypač ka siedu pirmami souli. Nu visuokių kuriuozų pasitaika, beleikt tik nusižvėngti i ožmėršti... Ryta bus nelengvu atsikėlti. Iki   Milda Aliou Labs.  Viel grįžau į normalias rutinas viežes. Lyg iš negyvenamas saluos numei. Mata, tris savaites guliejau liguoninie. Čia Mižniuus.. Šį ontradeinį paleida. Išsiprašiau, dėl muokslų. I tap jau pakonkama atsilikau. Mon nustati vidutienia stiproma depresiją, ka vieną kartą, padronsinta i pastūmieta draugis apsilonkiau pas psichiatri. Po kelių deinų i atsiguliau. Pirmuom deinuom liguoninie patyriau šuoką. Mon laba tėn nepatieka. Bova viskuo, ašarų, baimis, apalpiemo ka sulašieja lašelieni. Tada atsisakiau adatų i parsikieliau į ramiesni palatą. Vėsą ton laiką moni stebieji, deriena vaistus. Ilgainiou apsipratau. Turiejuom net tuokį patuogomą kap rūkuomasis, tik cigarietų būdava nelengvie susivairouti. (Grįžusi mečiau rūkyti) Net susiradau draugų. O tu, kap suprontu, spartie sveiksti. Šaunu.       Alius Milda Labs. Pagaliau!!!!!! !!!! Eik sau. Kap šindein pramigau...pirmą kart šį mienesį. Laikaus skrupulinga tvarkaraščia, katrų pats sau susidariau, vo širyt prameiguojau. Kap pykau ont savis. Vo daba atradus TAVA laišką tarp kitų septinių viskas nuslinka. Aš tap džiaugous! Kvaila, žinuoma. Pats baru savi, bat nieka negaliu padaryti. Dėkavuoju Tava DRAUGIE, kad nepalėka Tavis bieduo. Aš tap nerimavau nesulaukdams tava laiškų, mislijau, kad dėl mona negaliuos nebraša mon. Ačiū, kad atsileipie. Linku tau pasveikti, linku geruos nuotaikas, siekmies muoksli, i visor kor kitor. Mona sveikata pasak daktarų tikra gera. Da neužilga reiks daryt operacijėki. Atlaisvint nervą, nes kairies kuojis veinuos posis nejautu i bloga anų valdau. Bat daba pirmiausie nuoru pabandyt eksternu palaikyt egzaminus abitūras . Muokytuojee vis dronsin. Pabandysu.Je neišdegs, muokysous da metus. Kėta kelia mon nebier. Aš jau nebibūsu stiprus kap onksčiau. Žina, ka aš guliejau i negaliejau pasikelti, laba noriejau rūkyti. Vis svajuojau:  vo parvažiousu, ta atsirūkysu. Nu tada ta bus gera. Ka gryžau kažkap i nebipagalvuojau, kad reik parūkyti, kol neatieja bičielia. Tada ta parūkiem atsakontie, net nomiškee užsiota. Bat tada i bova paskutinis karts. Nes po tuo moni pradieji  jimti šleikštulys vein tabuoka kvapą pajotus. Šeimuo aišku visi džiaugas dėl tuo. Vo aš net nežinau, a džiaugteis a liūdieti. Tus piningus, kor išleisdavau cigarietiems jėmiau dieti į taupykli. Ne, tikrų piningų šiou metu neturu. Tik įsivaizdouju, kad atidedu, atitinkamas sumas užrašau lapelie i metu taupyklien. Po metų  paveiziesu, keik bus susitaupen. Gal tada i pasidžiaugsu. Diekui tau, ka parašie. Laba diekou. Iki kėta laiškielia.. Atia.   Alius Mildaa Labs. Nu i viel tu moni paleikti nežinomybie. Vo mona muočia po švėnčių išvykst į užseinį. Darbi atuostogas, ta galvuo biškį ožsidėrbti užseinie. Našta aš anai. Matau. Stėngous kou daugiau sukėšti į ton dorną galvą, gal gausu kuokia darbelia nuors kokiuo istaigėlie, gal sekretuorium. Sveikata taisuos. Jau geriau vakščiuoju, bet romsčia da reik. Siekmies tau Milda. Laikykias i eik par kitų „lavuonus". Myliek savi.  Noriečiau tavi pamatyti, pakalbieti, bet, gaila,  da negaliu pakveisti į pasimatymą. Alius.   Milda Aliou Labs. Mon velykines atuostuogas. Nuors atuostuogauti nier kada, reik muokyteis, paišyti eskizus, nes po Velykų pirmuoji dailis egzamina paržiūra. Šeik teik dėl tuo nerimauju. Vo tau pataru laikyt brunduos egzaminus, juk nieka nekainou, neišlaikysi - bandysi kietąmet. Diekou už tuokius gerus linkiejimus. Gera nuskumbieja: „eik par kitų lavuonus i myliek savi" :) Vo šiap jau pavasaris, kas moni džiugin. Toliau lonkau kalvystis būrielį i mąstau aplei juvelyrikas i kalvystis studijas. Veini saka, ka geraa,vo  kiti, kad profesija be perspektyvų. Nežinau... Siekmies greičiau sveikstont. P.S. Vo tu Mižnius gyveni? Klyksmas   Alius Mildaa Labs, pražuveli. Pirmiausie atsakysu į tava P.S. Mižniuus gyven mona tievs. Mama parsikieli į kaimą pas sava sugyventinį. Dirbti važiniejaas į Mižnius. Daba atostogau. Jautam, kad ateitie anuos darbuoveiti gal bankrutouti. Vo būt priklausuoma nu patievia nenuor, ypač, ka da i aš esu kartu. Velns mon leipė tuus šuokius šakuoteis... Nuoriejau priš draugus pasiruodyt? Net nežinau. Keiku i prakeiku ton valondą, kada sugalvuojuom tėn važiouti. Tap sunke, tap baise, ka pagalvuoju aplei sava ateitį. Jautus niekam nereikalings, tik našta kitims. Parskaičiau Tava laišką i tuoks pavyds sujiemi.... Tu muotriška gali stuovieti pri žaizdra, nuors tava ronkas silpnas, gali kalti i nukalti kažku, vo aš ...priversts pagalias romstyteis, nuors ronkas turu stiprias, bat jau kuo gera niekada neatsistuosu kuo nuors neįsikiebis. Veina kuoja beveik visiška neklausa monis. Nuors iniršis monkštinu, bat ana neklausa  i viskas. Ačiū ož padronsinėmą dėl egzaminų. Bandysu laikyt, nes i muokytoja dronsin, saka kad turietų pavykt, nes esu gabus. Bat i varau vos ne viesą parą. Kitap negaliu. Je neturiečiau tėksla, kuo gera stuogs nuslinktom. Laba dėkings esu patieviou, mama. Žinau kad anim sunku, bat anei neatstum monis, nepriekaištau, vo skatin i ragin nenusiminti, nepasidouti... Ai susigraudinau. Nereik žliombti. Rek liepti aukštyn, kad i „par lavuonus“. Je aš neparlėpsu, kits parlėps par moni. Negal tuo leisti. Yr atvažiavis tieva bruolis i tujau išvažiouju pas anų. Pabūsu par švėntis. Pasilgau pusbruolių. Klibinkščiouju krauteis knygų i lekam. Ate. Laikykias, draugužel. A galiu tavi vadinti draugužele? Alius.   Alius Mildaa Labs.Čia rašau neAalius. Aš Martyns anuo pusbruolis.Aalius praši tau parašyti. Anam laba bloga. Ons parlyžouts, negal ne judieti, ne valgyti. Maitin par zonda. Vakar pradieja kalbieti. Paprasi, ta rašau tau.Buk gera parašyk anam, pagousk. Iki šiuol su tievu pakaituom budiejom pri anuo. Pradieja taisyteis po operacijas.Muotina užsienie, kol gavuom anuos sutikiema, viskas nusitėmpi. Parasyk Aliou.Aš anam paskaitysu tava laiška.Anam reik palaikyma. Prašau.Gruobamies mėnkiausia siūla, kad anų išgelbiet. Padiek, maldauju. Martis.   Milda Aliou Labs. Baisu dalyką išgirdau. Kuoki da operacija? Kas baisaus tau nutieka? Juk buva pradiejis taisyteis, muokes. Aš kap tik ne kartą buvau susimąsčiusi dėlkuo nebiparaša. Galvuojau, jog muokslas užsijiemis. Aš kuol kas laikaus gera. Mėnka bevartuoju vaistų, nes anei moni sluopin. Tik geru homeopatinius, brongesnius i saka veiksmingesnius. Galvuoju ka viskas praeis. Juk tikra  prasčiau žmonims būn. Atlaikiau dailės egzamina paržiūras, belieka kėtą savaiti apsiginti darbą priš komisiją i baisiasis dailis egzas bus baigts. Šleikštulys kėln pagalvuojus aplei egzaminus. Žina, nieka pastarouju metu nebnuoru, ne muokyteis ne dirbti. Tik vasaras lauku, kap manau i tu. Gaila ka viel liguoninie atsidūree. Pasakuok viskon kas nutėka.   Milda.   Alius Mildaa Labs,Milda.Rašau ne aš,vo Martis.Aš diktouju. Esu Vilniou liguoninie. Pas diede daugiau vakščiuojau, pradieja skaudieti nogarą. Galvuojau iš pavargiema. Da pasimunkštinau daugiau, i lipont par soulielį (veins monkštuos pratiemų), pajutau nogaruo dygulį i nusmėgau. Prabudau liguoninie po operacijas.Pasiruoda negera sugiejusia kaula krašts užspaudi nervą i moni parlyžava. Daba po operacijas jautu puikie i kuojas i ronkas, bat turu gulieti nejudiedams, tik masažą mon dara du kartus par deiną. šuona prakiora begulint.Ta gulu ont linų siemenų.Biškieli lingviau. Da dvi savaitis rek iškensti. Tada jau leis po biški judieti. Daba nė galvuos pačiam pasokti neleid. Mama ištisa pas moni sied. Džiaugus nuors tou,  kad nervs nenutrūka, ta pamažu neskubiedams jau galiu kalbieti i maistą pats praryti. Daktara saka, kad daba bus viskas gera i aš galiesiu vakščuioti. Tik reik laika, vo paskiau viskuo teks iš nauja muokyteis. Kap tau sekas?Kap agzamina? Tikous viskas gera su daili. Juk tu tap nuostabie paišaa. A tėn pat žadi stuoti? Neparsigalvuoje? Parašyk mon. Nuors tava laiška galiesu paskaityt tik kėtą sobatą, kap Martis atvažious. Mon pačiam da nieka negal. Iki kieta laiškelia. Alios   Milda Aliou Labs. Nu gera, ka jau taisas. Veina vertus šis nutikims tau i operacija išėja į naudą, gi viel galiesi vakščiuoti. Užjautu tavi dėl lieta gydyma i beleikt stebieteis tava kontrybe. Aš pati asmeniška laba nemiegstu medicininių procedūrų, nuors reta sergu, aplei lašelines nė kalbuos niera. Kažkor priš puorą savaičių įsigijau joudą kačiuoką, (jau trets katins numuus) nuotaika praskaidrinti. Laba gražus i išdykis, grauž mona batus kap šuniuks, kartu meigtam. Vis niekap nesugalvuoju anam varda. :) Preitą pėnktadeinį vyka paskutinis skambutis. Nieka ypatinga. Dvi deinas priš anų su klase surėngiem eskursiją į Siguldą (Latvija). Irgi nieka įspūdinga. Pasisomdiem filmoutuoją, visi tuokei linksmi staipies priš kamerą, vo aš anuos privėngiau. Kap įprastaa grįždami prisigieriem. Už tuu muotina supyka. Vos beišleida į balių. Švėntis deina bova viesi, teka onksti ryta drebieti su mėnka apronga par rėnginį pri Mižnių kulturnamia i šiap fotografoujinteis. Važiniejuom senu geltuonu ikarusu, pri katruo i kiti aplinkinie nuorie fotografavuos - gi tuoks antikvariats! Visų kitų nubuodybių neverta pasakuoti, vis teik nuotraukuos gavaus negražie. Baliavuojuom Šikniuus. Visa nuormalie bova, tik koisie pjuovi išiejus laukuo parūkyti i pirmuoji numij išvažiavau. Beveik nieks nepasveikiena kap prider, žina ka atein į rėnginį muokykluoj i visims matont įteik gėlių. Tik iš kalvystis muokytuoja  gavau midaus, pasilaikysu ypatinga pruoga. Mon jau baigies visi egzamina. Laikiau visus valstybinius: lietuvių, dailis i istuorijas. Istuorijas parašiau šindein. Bova laba sunkus, bat tikous, kad išlaikyts. Į lietuvių egzą vuos nepavielavau, ta bova stresa. Su dailis pamuokuom ne kas, daug praleidau, bat daba mon veinuoda šveit. Da keli reikala muokykluo i laisva. Vakar maudžiaus Vėntuo. Visa neplanouta, tiesiog ka karšta deina ta nusimetiem drabužius i į viesų vondinį. Laba nuoriečiau išmuokti plaukti. Greičiau sveik i nepraleisk visuos vasaras liguoninie. Parašyk kap tu.   Alius Mildaa Labs, Milda, viel raša Martis. Aš da negaliu. Mama da išsiprasi savaitie atuostuogu nemuokamų. Kėtą sobatą  anų pakeis mona „patievis", nes daktara saki, ka pradies moni konkint i reikies stiprių ronkų. Kol kas mon da neleid visiška judieti, net galvą sukinieti draud. Visa nogara žaizduota, vakar daktari patari pamiegint kopūstus, ta mama nopirka i daba guliu ont kopūstlapių.Lyg i mažiau skaud. Da savaitieli.Kap lėta slenk laiks.Kaskart vis lėčiau. Birželia keturiuoliktuoji,  vilteis i gedula deina ne tik Lietuva bat i mon . Vilteis, ka bus viskas gera, gedula, ka galiu nevakščuioti, net nesedieti. Ton deiną išsisprės mona likims. Lauku anuos lyg paskutiniuoja teisma: į dongų a į pragarą.... daba esu skaistykluo. Nuplauki  visi egzamina, svajuonis, belieka  veina veninteli viltis, veins klausims, į katrų  atsakyms  douts bus tų keturiuoliktųjį deiną. Kalbu i verku. Martis saka ka jau gera kalbu.(tap i yr - čia aš tap sakau.Martis.) Suprontama. Vo kuoks bova sunkus leižuvis... Kada žinuosi egzaminų rezultatus? Kap žinuosu, kap išlaikee, tada pasveikinsu su vidurienis baigimu. Je gyvs i sąmuonings būsu. Raša,ka turi kačiuoką. Nuoriečiau, ka pas muni pri ronkas priglodis meiguotu...pūkouts, švelnus... saka varda niekap neišrenki. Siūlyčiau draugužiu vadinti. Gal katinaa neišdoud, kap žmuonis. Ačiū tau, ka paraša. Lėngviau ka žinau, ka tu nuors retkarčias aplei moni pagalvuoji, ka i po vidurnakčia. Kų veiki tap vėla, ka nesimeigt? Kap tava sveikata, kap nuotaika? Tas įtėmpts egzaminų laiks gal bet kų išversti iš klumpių. Jau bova daktaryti. Leipi Marčiou atsisveikinti so monim, nebvargint. Tujau dous migduomųjų puokaičiou. Tap lėngviau stumti laiką. Ate. Martis pažadieja i kietą sobatą atvažiout... Siekmies tau Milda i geruos vasaras. Parašyk. Lauksu. Laukont lėngviau.        Milda Aliou Sveiks. I viel rašau paskutieni akimirką. Galvuoju, ka rytą galiu neatsikelti... i likčiau tau neparašius. Miegstu panaktinieti, paklausyti muzikas, nesvarbu išmeiguojus a ne, vis teik ilga nesimeigt. Vaistų negeru, kuoki esmie - aš  anaas netiku. Šindein trumpam pasivaidenau muokykluo, galvuojau atiduoti likusius vaduovielius, bat neišdegi. Visor vyka dešimtuokų išleistuoves. Atsyminu, aš sava nedalyvavau, galvuojau kam, juk vis teik dvylika baigsu, niekor neisu, tegu kiti i švent. A gailius? Nežinau. Labiau gailius tuo, kad buvau uždara, nuors i daba nedaug tepasikeičiau. Sutinki naujus draugus, anus prarondu i po biškį užsisklėndu. Gaila tuo, ka žmuonis rond lėngviausi sprėndiemą iškilusiuoms bėndravima pruoblemuoms sprėnsti -  nutrauk bet kuokius santykius i praded viskų iš nauja. Jau nuklydau nu temas. Preitą sekmadeinį Pikniuus vyka gegužieni. Tuoks prastuos kuokybis rėnginys į katrų susirenk omžina maža žmuonių. Tad vos sulaukusi vidurnakčia išėjau nomei. Girdiejau bova grumtynių. Kada apsiein be anų.  Dailis egzaminą išlaikiau devynetou. Noriejau dešimteis. Ypač ka klasiuoks išlaiki dešimtokou, nuors aš jautus už anų geresni. Kitus egzaminų rezultatus sužinuosu po mėnesia. Dailis metinis pažymys 7, kuoki sarmata. Tikra nekentu tuos muokytuojas, užsisieda ont monis i veinetus raši kada panuoriejus, tap i pradiejau praleidiniet pamuokas. Nu bet teik tuo. Svarbu, ka egzamina praėja be stresa. Vo šiap jautus geriau. Gi jau vasara. Draugi išvažiava su sava draugu (tolimųjų reisų vairuotuoju) į keliuonę (reisą) po Euruopą puora savaičių, ta deinas slenk nubuodie. Reik sugalvuoti kų veiksu par atuostuogas i pradieti roušteis stuojamisims. Kol kas ta veininteli mona baimi. Kap laikas? Tikriausie laiks smaug kap virvie. Nu bat būk kontrus. Iki kieta karta.   Alius Mildaa Ačiū ačiū už laiškielį. Džiaugus, ka daugiau papasakuojie aplei savi. Ta savaiti mon prabiega greita i lėta, džiaugsminga i be gala skausminga. Kap i bova numatyta, mamą pakeiti anuos draugs. Bat neatvažiava Martis, ta tuos deinas laba prailga belaukont tava laiška. Užtata šindein džiaugus be gala, ka muni į Druskininkus palydieja diedi su Marčiu. Veeži su greituoja, nes negal mon da sedieti. Tik vakščiuoti i gulieti. Gavau specialią luovą, katra pasilenk statie, aš tik prisiglaudu pri anuos i ana nusileid kartu su munim. Nebreiks pri monis niekam budieti, padieti mon pasikelti, o tas laba sunkie vykst, kadangi aš pats negaliu kelteis. Bat aš vaikščiuoju!!!!!!!!!!!!!!!!!!!!!!!!!!!!!!!!!!!!!!!!!!!!!!!  Milda aš vaikščiuoju be ramintų !!!!!!!!!!!!  VEINS!!!!!!!!  Laba skaud, bat tas pamažu praeis. Daktara saka, ka skaust nu raumenų sustingiema. Reik monkštuos. Čia Druskininkus bus viesas įmanuomas procedūras mon atsigauti. Išvažiuojint iš Vilniaus daktars pažadieja, ka būsu kap naus.Plepu aplei savi. Džiaugus, ka tava savijauta geresni. Nenuleisk nuosis. Stuok muokyties, matysi viskas bus gera. Bet jau visi siunt prašymus. A tu jau kor siunte? Mona buveij palatas drauga šiou muomėntu aplei stuojamusius i tešnek.Teik seni (aplei sava vakus), teik jauni, aplei savi. Mon tikriausie šioji vasara nuplauks be egzaminų. Teik tuo. Aš vaikščiuosu i tas svarbiausie. Kon tik Martis su diede atsisveikiena. Mon palieka kompą. Galiesu susiseikti so muokytuojas, viel tensu muokslus. Kon mon daugiau čia veikti du mienesius. Jau leipi rouštis eiti į purva vuoni - pabūsu šernu. Kažin kap čia bus, juk mon da nugaruo pragulas neužgieja. Gal tėn nedies porva? Nu ta aaaaaaatsisveikinu i lauku laiškielia nu tavis.  Ate.  Siekmies tau linku visur i visada. Alius.       Alius  Mildaa  Labs. Skubu pasidalinti džiaugsmu. Aš jau numij. Nebišbuvau viesa skirta laika. Mon viskas gera. Nieka nebskaud. Vakščiuoju be juokiuos pagalbas. Tik sedieti da neleid be posmečia. Teik tuo. Gyvensu, vaikščiuosu. Vo tas svarbiausie. Daugiau į šokiūkščius net nepaveiziesu. Teik par anus prisikintiejau! Neatraša mon, ta nežinau, kap tau sekas. Gal jau studėnti? Alius.   Milda Aliou Sveiks. Atleisk, kad delsiau atrašyti, nuors el. paštą tėkrinu kožną deiną. Džiugu, kad jau esi numeij i gali gyventi normalų gyvenimą. Mon pastarėja du mienesia, nu paskutienia tava laiška, praėja lėta. Vo i mona gyvenima temps bova liets. Kon galiečiau nauja papasakuoti? Nu atuostuogas šimeta mon neįduomias, neturiejau jokiuos įdomiuos keliuonis, nuors su draugas planavuom iškylą gamtuo, bat.. Leipas pirmuom deinuom laikiau stuojamusius egzaminus Vilniou į dailis akademiją. Praleidau tėn tris deinas su klasiuoku i da veina mergina iš Mižnių. Nuvykuom traukiniu. Išsipirkuom nakvyni bendrabutie. Patys egzamina nebova laba sunki, tačiau vis teik susimuoviau. Bova daug stuojančių, i vos nuvėjusi nusprendžiau, ka mon šakis. Dvi deinas po šešias valondas su pertrauka reikieja paišyti iš natūras i tapyti. I žina vis teik negavau nemuokamas veitas. Visi pininga kap į ožpakalį, pagalvuojau. Del krėzis valstybi skyri par posi mažiau kompėnsoujamų veitų, gi konkursas bova didžiulis - į veiną veitą pretindava dvidešimt keturi žmuonis. Kitor prašymų daugiau padavusi nebuvau, ta galvuojau, ka viskas prapouli i reiks metus sėdieti numeij. Vo studijas kainou aplei dvyleka tūkstončių litų par metus – ta žvieriški pininga. Bat kap akademija nebsurinka studėntų, kainą nuleida keturesdešim pruocintų. Mon ta bova puiki žinia i aš padaviau prašymą studijouti. Žina, šimetą turiesu kap niekada ilgas atuostuogas, nes mon muoksla meta prasidies tik nu spalia. :) Liekusias naujynas aprašysu kitami laiški. Alius Mildaa Labs. Ačiū už laiškielį, katrų parskaičiau dar to patį deiną, ka gavau. Vo tap i gyvenu stačiuom arba guluom. Sedieti galiu nebėnt sapne....VO TAP NORAS..... No teik jau čia tuo blogoma. Je teik iškėntiejau, ta čia jau zoikia ašaras. Šiap jautus gera. Tik ka ilga veinuo veituo pastuovu, ta strienas praded skaudieti, tada jau biegu pagulieti... Džiaugus kartu so tavim, ka gava nuolaidą muokslou. Deja i septyni tūkstontie laba dideli piniga. Tava mama laba gera, ka pasiryža tau skėrti trisdešimt tūkstončių muokslou. Aš be žada. Tu laba laiminga i mylyma esi. Nu esi tu laimis vaks. Vo aš viel toliau krimsu vidurinį muokslą. Varysu dvylektą klasį. Viel numuus. Tik daba jau aš važiniesu į muokyklą uždoučių a atsiskaitymų, vo ne muokytuojaa pas muni. Mama vos galus sudur.  Kun bešnekieti aplei muokytuojų somdymą. Nu i viesas naujynas pas muni. Gulu apsikruovis knyguom.  Pavakščiuoju, kol pavargstu, padarau monkštą. Lauku nesulauku deinuos, ka leis atsisiesti..... Ta iki sekončia susirašyma. Visuokeriuopas tau sėkmies... Alius.   Alius Mildaa Labs. Nu ir viel gyvenu pas mamą i toliau srebu muokslus. Iki Naujų da pas moni vakščiuos muokytuoje, aš da par silpnas važinieteis, vo vieliau jau aš pats. Pagaliau baigses mona neįgalums, nuors ons neišnyks viesą gyvenimą.... Kap tau sekas, kų beveiki? Kor besimuoka? A nepakeitee planų sava? Su geriausias linkiejimas Alius.   Milda Aliou   Sveiks. Gera, ka muokas. Vo aš da siedu numeij, lauku spalia. Kažkap nefaina ka mon muoksla prasided vėliau. Sesou jau muokuosi Vinkšnų pruofkie i gyven bindrabutie. Susitinkam savaitgalias. Laba pasikeiti, iš uždaruos i piktuos tapa maluonia i bendraujinčia, net sunke patikieti, ka da priš puorą savaičių laba pykuomies. Žina, kuožna trauma paleikt sava žymi, ne visi ronda išblunk i ne viesas nuoskaudas pasimiršt. Gal šneku banalie, bet pats gyvenims yr kėnksmings.  Mas ne augala, negalem ataugti be žymielis, tačiau galiam būti optimistas i džiaugteis sava laimi, kap tu savuoja. Po tokiuos traumas viel ont kuojų  į normalų gyvenimą - čia tiesiog stebuklas. Nu vo pas moni tas pats, numa numučie i tei patys iki vakara tušti. Bėnt jau meiguot galiu ilga. I mintis, jog muokestį už  muokslą mon sumažiena da dešim pruocėntų,  šeik teik goud. Įdedu nuotrauką sava katinėlia, daba ons didiesnis i gražiesnis, bet skaudie kondžiojas :) Lauku laiška.     Milda   Alius Mildaa Sveikinu su pirmuoja studijų deina!!!!!!!!!!!!!!!!!!!!!!!!   Milda Aliou  Šventi tik rytuo,vo paskaitas nu pirmadienia. Bat vis teik laba ačiū   Alius Mildaa Sveika, mona draugi. Tur būt galiu tap tavi vadinti. Vos nepražiuopsuojau tava šventis...Su gimtadeiniu! Geruos nuotaikas tau linku i par darganą i saulietą deiną, sveikatas i sėkmies.  Niekada neliūdiek.  Kap tau sekas. A laba sunkie akademijuo muokyteis? Aš viel muokaus numij, nes vis da negaliu siesteis. Po naujų važiuosu Palunguon į reabilitaciją. Muokysuos sedieti.  Tikous sulaukti atsakyma. Alius.   Milda Aliou Sveiks, susirašiniejima draugs. Diekavuoju už sveikiniemą, maluonu sulaukt laiška . Tik par gimtadienį teka biškį sirguliout.. bet šiap viskas gera. Mokinteis niera laba sunkie, bat reik daug paišyti, žuodžiu daug darba. Iš kart po naujųjų egzaminaa i paržiūras, tap visas atuostuogas teks dėrbti. Laba bijau prisidaryti skuolų, nes liubiju patingieti.  Baraki gyventi linksma, tik pirms mienou sunkus. Turiejuom laba žiaurias krikštynas, kuokių Lietuvuo daugiau nebūn. Vis da nepasveika? Tikus reikala sparčie taisuos :) Iki greita. Milda   Alius  Mildaa Labs. Ačiū už laiškielį. Žadiejau rašyt tik priš pačias švėntes, pasveikinti. Bat turu sveikinti iš onksta, nes rytuo išvažiouju į Vilnių tyrimams. Tėn praleisu visas švėntes.  Jegu mona gijims ein tap,  kap tikaas daktarą, ta sausia pėnktuo jau būsu Palunguo. Dvidešimt veiną parą gaunu reabilitacije. Vo je ne.... tada nežinau, kon su monim darys... Tikus, kad viskas bus gera, nes jautus pakankama gera.  Ta ilga kuo gera nebiparašysu. I muoksluus atsilėksu, nuors kningas vešus, bet be muokytuojų.... Gerų tau švėnčių i sveikatas.   Milda  Aliou SU GIMTADEINIU!!!!!!!!!!!!!!!! Je užseinie gyventum, jau būtomi pilnamietis i šnapša liousie galietumi pėrkti. Vo pas mumis jau trys metaa, kap gali. STIPRIUOS SVEIKATAS TAU!!!!!!!!!!     Labs, Milda. So Naujas Metas. AČIŪ!!!!!!!!!!!! Aš gimiau iš nauja. !!!!!!! Tap ilga Tau nerašiau, nes vis laukiau sava likiema sprėndiema. Ka šindien gavau atsakymą, ta šuokinieju ligi lubų i da aukščiau. Aš esu visiška sveiks, keik gal būti sveikam po tuokių įvykių. Saki, kad su omžium ora parmainas mon primins jaunystis nuotykius, bet daba galiu jaučius muštravuoti. Joukus.  Žinuoma, fizinis darbs jau ne mon. Stogaas nesikarstysu i maišų netumpysu. Bat šiap juokių apribuojimų nebturu. Daktara pasaki, ka aš laimis vaks, ka aš gyvs stebuklas. Ta vo. Nu vasaria pėnkiuolektas pradedu dėrbti.  Žina kor? Specialiųjų puoreikių vakų darželie valytuoju. Nuoru nuors truputoka prisidiet mama pri mona išlaikyma. Muokysous vakaras, vakarinie suaugusių muokykluo. Nu jau šimetą tikra baigsu vidurieni, nes į šuokius daugiau ni kuojis nebkelsu. Sediesu numiej. Ilgainiou gal geriesnį darbą susirasu. Vo  kap tau sekas? A patenkinta sava pasirinkėmu? A daug draugų įsigijė tėnaas?. Turu prašymą - Aš nuoru i toliau su tavimi bėndrauti. A rašysi mon? Tava susirašiniejima draugs Alius.