Buva didele tamsi naktie. Berna arklius pyvuo dabuoji. Turieji i nadideli ugniki usikūrin. Ka naužmigtum, ani baikas visuokis ruokava, gandina vyns kita i dikčium dranses pasiruodyt nuorieji.

      Vuo ta pyva gera varda sene naturieji. Kuožnuo naktie negeri dalyka pruovijuos, Vyns berns pasakuoji. kad tanke naktie girdiedavis kap puo žemiem kažkas dūsū. Anskis pasakuoji, ka pyvuo girdieji, dikčium keista, avinati bliaunant. Pasakuoji, pliurpi, vyns už kita baisiaus, - vuo ve i pusnaktis užeji. Visyms tuoks myks užeji, pram tyse natryvuo, širdie stuo. Tik Juonis namykt. Anam tuoks jūks užeji nagal ištryvuot - žveng vyns, kap pablūdis.

- Ššš, ša, par tavi nieka nie girdieti...

      An tuo pasakyma, tik sugrumieji, sugurguliava, žemi pradieji smigti, atsivieri skylie i anyms bamatant prisipildi vundens, Ugnie pradieji šnypti, gesti. Berna pūli biegti iš tuos vytas - nie arkle anyms nabarūpieji...

      Vuo ta kiaurymi plūda vandenelis. Biegdams išpluovi plati vaga katra ilgieji vingiava vingiu vinges. Atsirada upalis. Rundas rinkes apsuka kelis suodas. Iki pat nemuneli nubiega upi, pikta i vingiūta. Vuo varc tuoks i lika - Šyša, ba ans vaikis, musiek, anuos vardeli bus atspiejis.

      Upi i daba yr tuoki pat vingiūta, grūnantes krantas, vis su naujuom sytuvuom. I na vyns yr galveli palydiejis brisdams a basiplukydams Šyšuo. Kuožnuo vasaruo pasijam upi sava apieravuonis, sunke i nagyvus atidūd numiškiams.