- Kuo siedi be žada kap ropkė rokunduo,
Akim išvarviejusiom, murinas oustas?
Aš sėrpsto ėr tėrpsto širdele bebundont,
Vo to tiktas mieta pri atlaga ousta.

Kuo markstas kap kuošės su yla prijiedės?
Pastverso i gliebi kap kuisi longiniem.
Lengviau atgaivintė net nukėrsta miedi -
Tėik gluostiau, ka pūslė unt ronkas pritryniau.

Dieliun reks eiškuotė ka verdontiam kraujou
Nerekto kap zope iš puoda putuotė.
Nedaug aš iš tavės visa reikalaujo,
Nemislyk, ka būso išejus iš pruota.

Virš kaima šin vakara skraidė amūra,
Ne lonka pajiemėn, musiet arbalieta.
Kap šuovė, ta kiaura - per širdi, per rūra,
Galietumi ruonu tuokiun pagailietė.

Galietumi dietė kap trauklapi ronka,
Dontu ka proteza sustuotu barškiejien.
- Keik kartu, Uonelė, mon kuores unt spronda?
Ne tavės, durnelė - butelkas reikiejė.

Jė skėrt nebgalietiau nu Zuosės ėr Pranės,
Jė imtiau nu krasės keporė do katina,
Gal teik susisokusi būtom mon kramė,
Ka muni, Uonelė, ėr to prisipratintum,

Vo daba aš blaivos kap aniuola ašara,
Vein tavi bematont susoka mon vėdurius.
Ėjau tiktas karviem pamietytė pašara,
Nukrėstiau iš baimės, jė būtiau be žėburė.

Nesiūlikis monei kap kibis, kap sluoga -
Aš tavės baidaus kap kipšatis bažnyčias.
Ei, Uonė! Nukrėta..Tikriausė nusluopa..
Už kon ta karuonė? Turieso gaivintė.

---
O jėrgau, o margau! Užtėka kaimyna
Unt Uonės užkrėtusi šnarpštonti Prani.
---
Lig šiuol Prnis mint Uonės kepamas bynas,
Kas dėina užgerdams butelka samanės.