Vėsė aiške žėnuom kuoki dabar sėtoacėjė so ta bedabyste. Dieltuo mona draugelė, gavosi darba bėržuo pasiūlyma įsėdarbintė MAXIMUO pardaviejė apsėdžiaugė. Bova dėrbosi kaima pardoutovelie, kol ana nabankrotava (kor matyta, kaimė trys pardoutovės), ta jau šiuoki tuoki sopratėma toriejė. Napabūga nabagė nie ka pėnkiuolėka kėluometru reikiejė į darba važėnietėis, vo darbs ta jog 22 baigas, vo dar reks vėsuokės tėn kasas sovedžiotė, sosėskaičioutė.
Pamainuos vėršininkė iš pat karta anon ispiejė, ka ėlga napadėrbsėnti, karaktuorios par liets esos, pardaug nulaidi. Tep ėr bova. Kap nabagė pasuodėna į kasą nu ryta, tep mažnė iki vakara ėr siediejė. Vo da jog rek ėr i lėntynas prekiu prisėdietė. Ba pamperė nie iš vėitas, nes nier laika i tualeta nuetė, vo apie pavalgyma nie mėslės nier. Kol ana dėrba, aš veiziejau i anon ėr pavydiejau, ka tep greta svuoris krent. Sakau, ka jau mosėnt dėdele daug tun pirkiejun yr, ka tuos kasas tor smarke dėrbtė. Noje, ana monėi atsėlėipė, ka tik tep nabovėi, apsėveizi, ka vėina pati kasuo basiedonti arba dar kuoki naujuokele, vo je paspaude skambuti, ka daug pėrkieju, aten senbovie sokryposė borna, atseit, kas če yr ka nasospieji. Soenam, saka, nu ryta posės, kol parsėrieduom, ketorės ded jouda apie pėnkojė. Vėsuokiu nasamuoniu prišnek, tik ka ta jau aten, aptėlst trumpam, ėr viel ded apie ton, katra dar naspiejė atetė. Vo paskiau prasėded...Kava ėr cėgarieta, kava ėr cėgarieta...Jog senbovės, vėsas valės tor( iš septyniu dėrbončiu tik dvė narūkė). Nagana tuo, je priimdama kasa piningun nasoskaičiousi, tau vėsumet trūks 10 – 15 litų, mat yr kas nuveiz, ka naskaičiouji.. Vo ka pritrūka, vakarė dedi iš sava kišenės. Naujuokiems i pagalbas klausėmus atsakyma pro sukostus dontis, vo ėr tad navėsumet. Naištoriejė mona draugie, nukeliava i darba bėrža, vo tėn dyvėjas, kas so ta MAXIMA yr, ka naujuokės po puora mienesiu taištor.
Vot, tuokės mes esam lietovės - draugėškas, geranuorėškas, vėsumet skobontės i pagalba sėlpnesnims... Vo jog tėik nadaug tareikietuom...MAXIMAS valdže sostatytė grafėkus ėr pri kuožnuos kasuos pakabintė, nu kada iki kada priklausa higienas ėr kūna pamaitėnėma pertraukelės.