Eso Bėrotēlė -
Straini kap kvietkēlė.
Da strainiesni vaiki
Mon lėkėms pataikė:

Pėzėka Keistutis
Pri sosieda kūtės
Pareinont iš šuokiu
Meilės moni muokė...

No, ka pamyliejė -
Žanitėis reikiejė.
Bovuov šiuo tuo vērtė -
Skoudė gavuov kērtė.

Mōna Keistutielis -
Svēks kap batvėnielis:
Nikumet nesėrga -
Vākus monėi dėrba.

Nuors ta meilės siejė
Mon ėr apkyriejė,
Kiestis smaugė kinkas -
Net luovēlė linka!

Lieliu - kap tū pupu -
Pašalēs pritūpė:
Beveik kol pasenuov,
Pašalpuoms gyvenuov.

Tuokio darbo joudo
Kieliev vēdo Skouda.
Tik par mētu krūva
Srienas mon išdžiūva...

Ka išsēka skārbā -
Kestiou nebier dārba.
Vyra nenervuosi -
Leidau eit pas Zuosė...

Biega nākti kuožna!
Tiktā neatuožne:
Par pat Juona švėnta
Myžopie nuskėnda...

Daba leido dėinas
Aš, našlēlė, vėina:
Gluostau luovas kuojė,
Kiesti mėnavuojo.

Gero, pešo dūma.
Vākā - pas babūnė.
Vėina tik pagouda:
Vākštiuojint po Skouda,
Prisimint Keistuti
Ė sosieda kūti,
Kor pasėkavuojiev
Ė paprabavuojiev...