XXX
Nedielės dėina onkstėi rīta
Nuējė Juonis pas Marītė:
„Ui, kuoki poiki to mergelka,
Ka ė šerdelė mon nutvėlka!..
 
Pavuožuojau – prašīk Karbauskė,
Ka tautėška drabuži tau nuausto...
Vo paskou mitrē vėskou aprokoujau
Ėr i Naisius ont šliūba nuvažioujau!..“
 
Marītė ašaruoms bornelė praus:
„Karbauskis drabužieliu mon neaus...
Bet, je to moni imsi, – vėskou sotvarkīsio:
Tou tūkstonti euriuku pati sotaupīsio!“
 
Ė prižadiejė Juoniou: svēka būs a sėrgs,
Ont kuostiumelė Lietovuo uždėrbs!
Varīs po prakaita, badaus,
Bet tautėška drabuži gaus!
 
XXX
 
Juonielis bova vaikis kontros:
Lauk vėinus metus, lauk ėr ontrus...
Prapoulė merga – dinga kāp i prūda!
Vo gal i bagažėnė kas igrūda?..
 
Lig smertė palėks šerdie baisi ruona...
Kon dabā rēks darītė, Dėivali mona?!
Kėik dā laika lauktė?!. Laiks gīventė.
Belaukdams gal soskrabtė ė pasentė!..
 
Bet priš akis – Marītė, tik Marītė!..
Ė kuostiumieli rēktom pamatītė...
Juk sakė – svēka būs a sėrgs,
Ont drabužieliu Lietovuo uždėrbs.
 
No kas, ka metā tėi kap paukštē lek?!.
Je prižadiejē lauktė – lauktė rēk!
 
XXX
 
Po keliū metieliu Juonis veiz ė mata –
Aikšties vėdorelie stuovėniou mergātė.
Kažkamė regieta, kažkamė matīta...
Muocninkeliau!.. A nebūs Marītė?..
 
Ont galvuos – koskelė rūžavās mazgelēs,
Ronkuovelės – so zgrebnēs kotelēs.
Viejie plaikstuos tautėšks sėjuonielis,
Vo ronkelės gluosta straini kvartūgieli...
 
Drabuželē – tuokēs margās raštās,
Ėštaisītė so dėdliausēs kaštās!
Kaklos apsokts gelsvās karuoliokās,
Vo kuojelės apautas batokās...
 
„Kuoki straini to!.. Bet diekuo tuoki kūda? –
Dīvuojės Juonis. – Ėlgā laukiau tavės  –
Jau mėslėjau, ka ikrėtā i prūda.
Ėš meilės jau bovau nusėgalavės...“
 
XXX
 
„To aple meilė mon če nekukouk –
I truoba grētiau veskės, jiestė douk!..
Nespausk tēp smarkē, netėmpk sėjuonelė:
Po kuostiumelio – kaulā ė skūrelė!..
 
Matā, i ožsėinius nevažiavau –
Užteka tėik, kėik Lietovuo gavau.
Nesvarbo, ka ėšvėrstomem ėš kuota, –
Juk tor palėktė nuors kelė patrijuotā!“
 
Pavuožuojė ton karta Juonis,
Ka baguotesnė seniau bova žmuonis.
Vo gal muokiejė dėrbtė ė nejiestė?..
Drabuži siūdintėis – ne baikas kriestė!
 
Marītė dabā kap saulelė švėis!..
Karbauski pati i veselė kvėis.
Pakol baguotė būsem patrijuotās:
Vėsuokės biedas, krizės mums – ni muotās!