Pri mūsa nikomet natrūka keistiausiu notėkėmu ė īduomiausiu žmuoniū.
Bova tuoks tarps, kad mūsa kaimė ramībės nadavė tuoki ciuocė. Muoliūgu spalvuos, stuorus, garbanuotus plaukus dėngė mažos, tomse žaliuos spalvuos aksuomėnis katėlioks so nadėdėlė jouda balto bruoškė. Ana bova apsėmuovosi aptemta jouda šlebė lig keliu. Baltė, tėkriause tėkrū perlu karuole anā dėdėle pritėka. So dailēs, naaukštuos kolnėis bateles prakaukšiedava bėnt vėina karta i dėina. Ronkuo vėsomet toriejė tašė, kas anuo bova, galieje tik spieliuotė. Rast nieks anuos nabūtu ė pastebiejės, jego na katės. Ciuocė bova na vėina. Ėšpaskuos liuob žygioutė bėnt pėnkės katės. Kas anas tėik žaviejė, nieks nežėnuojė. Rast anas ciuocė bova užkeriejosi, vo rast tašie kuokiuos dešruos vėsomet toriejė. Tonke lioub prapoltė ė paprastū žmuoniū katės, bet po kuokiuos savaitės pargrīždava dėdėle pasėkeitosės. Pėlvieli pakasītė nabožteka, reikiejė aukštuos kuokībės masaža, ė tep tuoliau. Vėsė anou bova matė, bet tik iš matīma tapažėnuoje. Ni vėins so anou nikomet i ruodas nejė. Mosintas nedrīsa. Mūsa kaimė anou vadėna Šapuokliako. Ka vakā bova, tou krokodīla Gena mintėna žėnuojė vėsė  mona māmas ė tēti mētu vakā. Dar ė dabā kuožna vėita pacituotė galietu. Bova tėn tuoki Šapuokliāka, katrā mondroma natrūka, vo i anou dėdėle panaši bova ė ta ciuocė. Kažkas, baise pastabos, nežėnuodams tėkruoji ciuocės vārda, mosintas ė somėslėjė, kad ana īr Šapuokliāka, vo tas vards, kap sakont, ė prikėba.
Strazdanuotam Šapuokliākas veidė vėsomet švėitė daili šīpsena. Nieks nažėnuojė, kas ta Šapuokliāka  īr, ė galiejė pagalvuotė, kad anā pats biesos i žemė visuokiausės nalaimės neš ė tik šīpsuos, ka žmuogou kouki nalaimė atsėtink.
Vo vėina dėina baisos īvīkis atsėtėka. Tojau pat vėsė laikrašte rašė, televizėjė ruodė, vo jau „Kaima davātku informacėnės agėntūras“ veikė kiaura pāra... Laikraštiūs rašė: „Kaims lėka ba cėntrėnės autuobusu stuotėis“. Kaims nosprėndė - ka be jouduosės magėjės čia neapsėeta. Nuors stuoti novertė baisiausė mašina, ont katruos dėdėliem raidiem bova parašīta „Kamazas“. Tuoki mega īvīki nabova nu pat Smetuonas laiku, ta davātkas ė nusprėndė, kad čia kuokės jouduosės jiegas bus prisėdiejosės. Tuos muotrėškelės ītarėnietė pradiejė ton katėnū fiejė Šapuokliāka. Anuos nabdavė ramībės lėkosims kaima žmuonims, ė net kaima vīrus ītėkėna, kad rēk pasektė Šapuokliāka ė ėšsėaiškintė, kas ana tuoki īr, kor gīven ė kon dar planou. Atsėrada tik nadaugelis drosiausiu vīru, katrėi rīžuos ė napabėjuojė atlėktė tuokė svarbė mėsėjė kaimou.
Bova pradieta ėš onksta ruoštėis. Pasėiemė šakės, luopėtas, kačergas, deglus ė maldaknīgės vīra ėšsėrėkiavė laukė Šapuokliākas. Staige sošmiežāva Šapuokliākas ė pėnkiū anuos katiū šešele. Puoras vīru nablėka ėš karta. Lėkė parbalė vīra nadrose iemė sektė Šapuokliāka. Sekont par mėška, vīru iemė vės mažietė ė mažietė. Ka vīrams priš akis atsėvierė nuostabiausė rūma, anum  babova tik trīs - Juonis, Pranis ir Anupros – vīra, ėšgīvenė pavuojinga kaima mėsėjė. Anei nabova patīs drosiausė, kaimė anei bova patīs kvaliausė...
Kaims tuokiū pavuojingu darbū nabova regiejės no pat kolkuoza sogriuovėma laikū...  Ont Šapuokliākas rūmu sėinas bova namažos, daile nomaliavuots ožrašos „KATLANDIJA. Katinų spa ir pramogų centras“. Šapuokliāka bova verslėninkė ė platē pagarsiejosi tarp katėnū aukštuomenės tuo vėsa, kap sakont, smatuona/grietėnēlės. Pas anuos katėna lioub rinktėis net ėš trėju aplinkėniu parapėju. Vo kasdėinis pasėruodīms kaimė bova pažintėnė ekskursėjė.
Juonis, Pranis ė Anupros i kaima pargrīža kaip kuokėi karžīge, kap laimiejė kara. Žmuonis apsėramėna, nablėka baimės. Anėi soprata, ka nikuokiuos jouduosės magėjės nabova, bova - verslos. Vo stuoti novertė kamāzos. No novertė, novertė, kon čia bapadarīsi...