X  X  X


Nebėiškuokiau taka vėns i ontra:
Ciongs pakėla – ožpūtė lėktarna.
I ont gībgalio nebiper gondrā -
Tiktā joudas mėšės pruovėi varnas.

Apsėniaukė dongos - kāp i maiša
Spindolē, kor ligo siūlus verpiev.
Jau ė vuorā pasėiniūs ėšgaiša...
Žuodē žel – kāp žvīnās – tonkiuom kerpiem.

Aš pri longa grūdous - iveizietė
Nuorio vedoms luova, vedoms stala...
Ont anou - neatversta gazieta...
Katruo vėsas lėtaras ėšbala...

Bet alsou i kopra tiktā šaltis.
Driegmie smelkas kiaurā - lig pat kaulu.
Tuo, kas bova, nikāp neprikelsi!..
Nieka nepradiesi jau par nauji!..

Tiktā lauksi. Dėdlē ėlgā lauksi -
Rasint sapnie kumat aplonkīs tas...
Kuo jau ni par omžio neprišauksi,
Net je no tuo šauksma plīšto gīslas.