XV

1939 – 1944 m.

Meilė Kodorauskiu)1 Muosiedie tebova
Paauglīstės laikė keleta metieliu –
Kara dėinas, žīdā, iškastas slieptovės –
Nežėnā kou rasi rītė atsėkielės.

Meilė tēp pamiega tuo kampelė vaizdus,
Ka prisėmėnėmūs ėlgesio išsklīda.
Dėinas tuos kāp gielės ė kāp kara žaizdas,
Bundontės jaunīstės atrastė pavīdā.

Tėkrū muosiediškiu douna daug kartesnė –
Anėi tuo Baltounės)2 tarsi velnė vėngė
Mona tieva tompė ne ož kuokė esmė –
„Siūlė“ padėrbietė vuokėškuo padomgie.

Ne vėinam „isiūlė“, kėts ė nebsogrīža –
Nuošėrdē tarnava Adolpiou garsejem
Kas keporie sava piešė jouda krīžio,
So tās mūsa žmuonis vuobulautėis nejė.

M. Kudurauskaitė – rašytoja)1
Baltounis – 1941 m. Mosėdžio nuovados viršininkas)2

XVI

1945 – 1955 m.

Atėdiau muokīklas doris atėdarios,
Dar keliū poetu šėrdis ėšrīškieto –
Jog Botkutė Alma, Pabriežienė Marė)1
Sied so sava kninguom laikmetė karietuo.

Tīluos žuodēs Alma rinkini gracinga,
Vaizdās iliostrava patiuos sokortāsēs
Muosiediou paskīrė sava gražė kninga –
Duovėnuos brongesnės nikam nebsorasi.

Vo Marītē Gargždū pošīnelē uošė,
Mintimis nogluostė Žemaitėjės kluomius
Akmėnio priaugus pri žemaitiu kuošės
Muosiedė padongė glamuonie maluonē.

A. Botkutė (Bernotienė), M. Valavičiūtė (Pabrėžienė) –literatės, kultūros darbuotojos)1

XVII

1936 – 2013

Vo kas aš, kor vėskou če eso sodiejės?
Irgi muosiediškis iš pat Skouda gatvės.
Aple moni daug kas nieka negėrdiejė,
Nuors lonkiaus gimtėnie lig patiuos senatvės.

Dabar jau senatvė, retiau beatklīsto,
Bet pruoguos pabūtė veltou nepraleido,
Švėit prisėmėnėmās tuolėmas draugīstės,
Glamuoniejo žvilgsnio sotėktūju veidus.

Daug kou jau ne gatvie, vo kapūs beradės,
Parīmau ė skausma ašara nošloustau,
Ė tuoliau keliaujo līg i sava pradė –
Jau i mon paskėrta omžėnībės ousta.