Labas Daliuta,
Nu kou toliau tou gražiau. Pratesu Tava mintį del Brazauskia. Poikus bova žmuogus ne tik išvaizda, bat ir vidumi. Niekap nesupratau už kuokius griekus neprijiemi anuo kūna į bažnyčia.  Juk šiaas laikaas visus pakaruoklius bažnyčiuos apgeist: atseit pats Dievulis anim pruotą pamaišis. Vo čia?..
Vo kada par radiją išgėrdau, kad Brazauskieni praša rintuos, nas tor finansinių sunkumu, ta misliau, kad negeraa išgirdau. Bat yr kap yr. Kap Grybauskaiti kad saka:
- Istatims yr istatims. Ir kuo gera Brazauskia mirtis bus preteksts pakeisti istatymou ar nauje istatyma pataisaa...
Klausie kas par dakts tei Mažeikie. Nu yr Miests visa nebluogs. Šveisus, nebjaurus. Jau ir visa poikių numų atsirada. Bagotiej žmuones ne tap jau lėtaa. Tik valdžie KRIEZI ožkolnius dauža. Rašaa kad NAFTUOS nemate. Ir negalieje matyti. Ana yr tuokiami užkabuorie, geruokaa nu miesta į Skouda posi. I visteik par artei. Net sava Peivenus gyvendama (par 30 kiluometrų), kada put šiauris vakarų vies, anų užoudu. Patručei neblogaa.
Naliūdiek del nesusišnekiejima su draugu. Mona nuomuoni tuoki, kad nelabaa ir sakyti drinstu. Gal aš pagal savi. Kon daryčiau je munei tap pasakytų. Je aš nekalta, tap i pasakyčiau teisie šveisie. Bandyčiau įruodyti nekaltuoma, kad patikietu, vo ne pabiegčiau viskon paliekusi. Bat kap sakie, kad viskas vyka joukas, ta nier kuo įsižeisti. Vo je pasikarščiava? Ta kap atvies, pats iš viskuo kartu pasijouks ir viel būset draugaa.
Bat kų reik daryti je rytą atsikielis ganykluo rondi du veršius (2-3 mienesių) papjautus, vo pri anų besiedunti kaimyna vokičių aviganį? Vo dabar juk madinga kožnami keimi laikyti net po kelis dideliausius šunis. Dar ir kovinių veislių. Žinau tuoki atsitikiemą. Buočius su arkliuku ragiem vežies iš mėška medžius. Pamiškie du jaunuole vakščuoji su kažkuokiu į bulduoga panašiu šuniu.  Veins i klaus buočiaus:
- A nuori matyti kap tavi arkli papjaus?
Vo kits nelaukis atsakymą sušuoka šunei:
- Puci!
Šuo muomint šuoka pri arklia i nutvieri už gerklies. Bat i buočius bova ne iš kelma spirts. Gruobi kirvi i tvuoji šuniou. Jaunuolee pouli pri buočiaus, bat pabijuoji kėrvia. Vot i špuosas. Sužeists arklys, šou i dideliausi neapykunta tarp žmonių. I del kuo?  Kas gal i tu klausimą atsakyti? Keik žmuonių teik teisybių.
Ir kor tiktaa pasidieji Dieva isakims: \"miliek artimą sava kap pats savi\"?