Kon tau parašytė?..
Tuoks lėkau nekontėns,
Ka negavau ėš tāva šolėnēlės
     atsėgertė vondėns.

Vākštiuojau par nākti
     ėštruoškės ė sošālės -
Ė nebnuoriejau ni matytė sāva
     prakeiktuos truobālės.

Tomsi ana, šalta,
     driegmie vėrpėn kinkas,
Nes pečiaus vakar nieks
     pakortė nepaslinka.

Prisėmėnės tavi
     ė vedoms jaunystė,
Sovuožuojau ton nākti
     pas tavi atklystė.

Ni i priongieli mōnės
     to jau nebileida...
Ė nu kumet jau tavi
     mōna morza baida?

Vėsa nākti vākštiuojau
     ėštruoškės ė sošālės.
Be rēkala ton kārta išejau aš
     ėš šaltuos truobālės...

Kam ė berokoutėis,
     kuoks lėkau nekontėns,
Ka negavau ėš tāva šolėnēlės
atsėgertė vondėns...