Pasijiemusi pliečkele
Noejau aš pas Zuosele.
Mėslėjo vėskou sožėnuosio...
A belonka Pranis Zuosė?
Zuosė bova nusiteikusi
Lašiniu prikepusi petelnė.
Ė sosiedosės pri stala
Ruoda variev čiesa gera.
Zuosel, kap če to bevargsti,
Vėina dirbi, sieji, ari....
Rektom vyrėška tau gera,
Sokės vėina kart pri Pranė.
No i kas, ka čierka miegst...
Nagus tor, vėsor padies.
Saka, Pranis žadiejė skėrtėis,
Būto nebluoga prispėrtė...
Zuosė linkčiuojė i takta,
Pritarė, ka Pranė rektom.
Rek anam tik tvėrtuos ronkas...
Suraityčiau kap baronka...
Toukart aš nebiškintiejau,
Aplink anou da pridiejau:
Vėina dėina i pri monės
Pranis bova atsijuovėjs.
Prišnekiej vėsuokiu muonu,
Traukė pri žemės ož sijuona.
Prani, baik to vėina karta,
Vo paimsio aš kačerga.
Baisee esi ikiriejės,
Smėrdi šnapšė,
Ėsi gierės.
Nepatink mon vaike tokėi,
Kor prigierė prisišpuosėj.
Paskiau kriuoksio aš pri luopšė,
Vo to kėta gluostysi snoki.
Ek šalėn aš tau sakau,
Kol kočiela nepagavau...
Gausi i skūra to nu monės,
Leisk darboutėis nesimuonėjės...
Baise bova ons nekontėns,
Bet išejė niek nekondės...
Zuosė monėi gluostė pėti:
Tuo Pranele aš nuoriečiau,
Bet kad miegst uns mergas kėtas,
Tep aš elga nekintiečiau...
Maučiau lauk aš iš tuo kaima,
Miestė ėiškuotoviau vedo laimės.
Kas, kad poikee kvietkas žyd,
Ėivas kvep i sava daržos i
Če pardaug tu senu panu...
Monėi Prani sauguot rektom...
Miestė butoviau kap puona
Nuor tuo Pranė dar i Uona.
Patark monėi kon darytė,
Kap tas mergas pavarytė...
Če jau reikals patėis Pranė,
Kou uns rinkes – muni a tavi...
Lėkiau draugės nu šindėinas,
Prikabinkiau vaikiou ėinas,
Ka pu kėimus nelakstyto,
Vo veselės ožsėmanyto...
Atsisveikėnuov kap draugės,
Bočkius skielėv palei ausis.
Daba viel rupesni toro
Ka tuo Pranė negauto Uona.
Zuosee ėrgi buto gaila
Atėdoutė tuoki vaiki...