Tatas šėnrīt klausu:
– Naje a dā m īli munei, Juoni?
Žondā plīkst anuo, rauduoni.
Šėrdis untie kriopiu krut.
Mēilinās: – Sprėtni, Vuonut.
Kāp čia taves namīliesi?
Baiduos, ka kuočielu diesu.

Smūgis ētu kāp nu vėška.
Gėr ons munei – sēili tėška.
– Kap stirneli tu da straini, –
Strienas graiba, – Vuo, ka fainē
Īr prei taveis preisėspaustei.
Ētum patriūbuočēs gaustei.
Skaita kāp ėšDeiva rāšta.

Mėslinu: Ja, driebi nāšta.
Kāp dontes ei seina sukes,
Tāp spakains goli, kāp krokis.
Atsimērkē, praseižiuojē
Ī aldā, ont spruonda juoji!
Ale šerdeis naėšplieši,
Vožtapnuo razbāistvas biesa.

Ronka pakiš šėnkas šmuota,
Gėmiāu atjauta baguota,
Vožpil kuoki patermāsa,
Ka ei ropki nuseitāša.
Jausmā šliauž par skrondi tāka.
Tāp Deivālės jau eisāka –
Meilie, džiaugsmūs ė vargūs.
Dėkou anām – na grabūs.

Glaudūs, žeidu kāp ramuli:
– Kuol dā nekveit dausas numei,
A tei leitus, a tuos dāgas,
Svarbu, mudu puoruo sprāgam.
Reit ons vūsta, žeid bėjūnu:
– Pruovīčiau dā veina sūnu! –
Rein veizuolās, – Peins ė kraujs, –
Blėzg kāp aurs. Nu čīstā naujs.

Sokoutēn balvuons pašėrdi:
– Juonel, paršā žveigt, nagėrdi?
Juovala tutink ei tvārta!
Meili – pīst, vožgēst eiš karta!
Nuosi knēbin, mėnte mėnka,
Kāp greitiau eiš numei dėngtei.
Dāruos jau čīstā nefāinē.

Grūd ons munei.
– Kāp kuombāins kuoks,
Nie prasuktei, nie praaitei!
Žaltī rāins, kāilis vožkaita,
Dėdlė atkėšu jām špīga:
– Varpū namals vuons vuož dīka! –
Ėš luoveles drabnē spėru, –
Klionki turu, vuo ne vīra!