3. Ak, tėi vākā
Mes auguom Smetuonas laikās. Bet ė toukart mums bova liūdnā.
Vo, kāp ontā dabā so vākās īr? Nebžėna, kou rēk ontvėlktė. Nebžėna, kāp vākus rēk apdarītė. Kėik tū batu – malkuoms īr... Vo kėta karta so klumpelēs. Jė... I muokīkla ejuom so klumpelēs. Prisėsėms snėiga, šals tuos kuojės... Oi, oi... Aš tēso tik tris klasės bėngosi. Nedaug. Muokslā gerā ejė.
Muokītėis pradiesem no spalė pėrmuos. Vo bėngsem jau gegožės mienesie. Klasie liuobam būtė po dvėdešims vākū, vo muokītuojė bova vėina. Ė ana muokīs vėsas ketorės klasės. Ė vės tėik pat liuob gerā ėšmuokīs. Ne kāp dabā, ka muokītuoju īr krūvuom, vo vākā muokīklas bėngė duorā ne rašītė, ne skaitītė nemuok. Bet muokītuojē muokītė vākus toukart bova kėts dalīks. Vākā liuob būtė dėdlē ramė. Ne kāp dabā ka īr...
            No, jog dabā vākā īr kāp... Ui, ui, kāp dabā vākā īr... So anās, pamėslėjės, nesosėrokousi. Vākā dabā īr mondresnė, kāp mes paugė kā esam. Jė.. Jog dabā vėskou mata, vėsas plėkas sobėnės jau apruoda no luopėšė, apruoda vėskou... No, a ne tēp īr? Mes pasenė tuo nežėnuom, vo anėi vėskou žėna.
            Kėta karta vėšta nuories dietė kiauši. Žėimuos laikė kūtie būs šalta. Bova šiaudū prikrautas luovas. Ont šiaudās liuobam ė golietė. Parneš mama vėšta i luovas gala ė padies i tus šiaudus. Pataisīs lėzdieli tuoki ė itopdīs vėšta i tou lėzdieli. No, ė ta vėšta topies. Klausem:
– Mama, vo kuo ta vėšta če top, diel kuo ana če īr?
Noj, ė tērausemuos tuos mamas.
– No, ana top, ana kou nuors ėštopies...
– No, ė atsėras tas kiaušielis tam lėzdelie.
– No, mamīt, mamīt, vo ėš kor tas kiaušielis če dabā īr? Kamė ta vėštelė gava anou?
– No, vėštelė patopiejė, patopiejė, anā ėš pasparnelė ė ėškrėta tas kiaušielis...
No, vo dabā to anėms paaiškink, ka tēp īr...
– Aš žėnau, žėnau kuoki ta pasparnelė ė kamė ana īr...– anėi tojau pat pasaka.
Vo mes jau tėkiejuom, ka tēp jau ė īr. Ėš kor kėtor to žėnuosi. Arba veršieli karvė ka periejė – ėš kor?
– Ėš miešlū karvelė ėškasė,– liuob paaiškintė.
Matā, kāp bova. Vo dabā vėsks īr aiškē, vėsks īr, kāp tam žīdou "ui, kāp ont delno." Vo a tėi televizuorē vėsuokiu nepriruoda, vėsuokiausiu?.. Baisė matīmā vākams... Tor atētė laiks tuokėms dalīkams. Dėdlē negero laiko ruoda. Jog anėms paruoda vėskou. Ė kāp muotrėška gimda vāka. A če īr žmuogėškoms? Če ne žmuogėškoms īr, vės tėik. Jė... Nē, dabā, veiziek, anū nebėpakamandavuosi, anėms nieka nebėpāiškinsi... Ui, ui ,ui... Baisē prėklė vākā dabā.