Dėdis maitintuos

Santrauka:
Žmuogus ir tuoks sutvierėms, kad jegu ir nuors vėins šansos išlėktė, ons būtėna išnauduos vėsas pruogas.
Kretingos Jurgio Pabrėžos gimnazija
Birutė Šidlauskaitė, 3a klasė
Žmuogus ir tuoks sutvierėms, kad jegu ir nuors vėins šansos išlėktė, ons būtėna išnauduos vėsas pruogas.
Mona pruobābė Galdikienė givena šalėp Dimitrāva, Tarvidū kaimė, pri pat Darbienu kēli, patem mėška pašuonie so pėnkēs vakās. Vargė vargieli! Sūnkė bova laika. Vakā omžėna ėšstėpė bova, kėts i kėta liob veizieties, ka katram mamālė didiesni kousni napakėštu. Galdikienė ba penkiu pametėniu vaku turiejė šoni Rodi.Vo ons bovis na bikuoks šova. Je torgaus deina bova Kretinguo, Rodis vėsas greiteis rėtėna i Kretinga. Torgou staipies tarp muotrėškų, kol nukniauks dešruos baronką, ėš  kiuoci ėšvėlks sūri gāla, lašiniū brīza, susiveizies kuokė terbālė, pasimaus nēšmenė ont kākla ė parmaskatous nomėj. Toriejė šova keista karaktuori – vėsas geribes liob sokraus daržė ė apdėngs kopūstlapes. Kumet torgus bus Darbinus, Rodis šaus į Darbienus, vo parrėtins ratouts ė vainikouts. Veizies ė kuoki skaniesta vakams parnēštė.
           Vėsa suodos gyvēnima reikalā Rodiou bova aiškė. Je douna kepė Gėrdenienė,  dounēlė būtėna atsėdors Galdikienės daržė, po kopūstlapes. Kaimīna niekāp negaliejė iš dīvų išētė, kāp gal būtė tuoks gers vagės, katras duonēlė neš, vo lāšinius palėikt. Mat lašėne liob būtė aukša pakabintė.       Rodi išmanimams nabova gāla. Kor liob pakvėptė skaniestās –  tėn Rodi ė ėiškuok.
             Liob ons sokėnietėis aplink lėntpjūvė, šiorinietė tarp darbininku terbāliu so prėštėkēs. Ras Rodis dounas abrāku ė lāšini gāla so čėšnāka galva, kuoki vogorkla. Iščemeriuos Rodis vėskū ė šaus link nomū so gera nēšmene. Vo darbininka žvalgisis vėns i kėta, nikap nagalies soprāstė, katras iš anū ir tas vagis. Ni pati Galdikienė napamėslėjė, kad anuos šova tuokius drakus išdarinie, tik so savi rokoudamuos liob dūšė sāva ramintė, ka ir kažkuoks geradāris, ė parneštė i truoba vakams vėsku, kas pu kopūslapes sokavuota.
Vo ka vėina rita mēta išejusis i daržāli pamātė Rodi, bakavuojėnti dešruos gāla, soprāta, kas tas gluobies.
Ė kas būtū pamėslėjis, kad vėins šova dėktavuojė vėsa šeimina išmaitintė...
birutes

2013-03-08 12:24:57

Komentarai

Atsiprašome: komentarus gali rašyti tik puslapio vartotojai. Registruotis

Moderatorius (-ė): Ažeras

Sukurta: 2013-03-08 13:54:22

Puiki pradžia.

Vartotojas (-a): ardas

Sukurta: 2013-03-08 13:11:01

Kas galėje pamėslytė,tikra truopnus šou :)